Tilpassar dugnad i Herand

Herand bygdelag oppmodar folk som har god tid under koronakrisa, om å bidra med dugnad i nærmiljøet.

Det skriv styreleiar Gunnar Dalseth på Facebook. Dugnaden vert organisert slik at ein minimerer smittefaren. Laget har hengt opp ei liste på oppslagstavla ved butikken over ymse arbeidsoppgåver som ein kan gjera i bygda. Her er det òg plass for lag og folk til å føra opp arbeid som ein ser bør gjerast, og som passar til dagens situasjon. Når ei oppgåve er utført, kan ein kryssa henne ut på lista eller skriva ein kommentar om vidare arbeid. I retur får ein aktivitet og frisk luft. Dalseth er spent på korleis det vil fungera.

Døme på arbeidsoppgåver kan vera å gå ein tur med pose og plukka bos, skriv Dalseth. Ein kan òg ta ein runde på kulturstien med hekksaks og rydda renningar. Bygdelaget ynskjer at alle nyttar eigne reiskapar. Laget vil setja ut kostar i båtbyggjarmuseet og ved kulturhuset.

Tiltaket er like mykje ein invitasjon til å ta ein rusletur i bygda eller på kulturstien og rydda litt rundt seg. Samstundes kan ein ha oversikt over kva som står att å gjera.

Vanlegvis har ein denne dugnaden siste laurdagen i april, fortel Dalseth. Ryddedugnaden plar vera ein suksess. Omtrent halvparten av innbyggjarane plar vera med. Dugnaden har alltid hatt svært god oppslutnad.

– Me steller med bygda og gjer at det vert pent rundt oss. Det er ein verdfull aktivitet. Ein kan kjenna på at me bur i ei vakker bygd, seier bygdelagsformannen.

– Det er med og hjelper på samhaldet?

– Ja, det trur eg absolutt. Vanlegvis møtest ein til eit måltid i bedehuset midt på dagen som Jondal kvinne- og familielag skipar til. Den tilstellinga vert det ikkje noko av i år.

Bygdelaget har elles vorte nøydd til å utsetja årsmøtet, fortel Dalseth.