– Ver varsam med eld!

Det generelle bålforbodet tek til 15. april.

– Me vonar folk vil bruka naturen, men visa sunn fornuft og vera varsame. Ein bør bruka godkjende bålgrillplassar viss det ikkje er snø, seier brannsjef i Kvam, Torleif Ones.

Ein bør ta omsyn til skogbrannfare og vindtilhøve. Den som har laga bålet, har ansvar for branntryggleiken. Vedkomande bør vera både vaksen og edru, oppmodar brannsjefen. Ved bruk av eingongsgrillar bør ein ta forholdsreglar og følgja tryggleiksråda som følgjer med.

Når ein er ferdig med eingongsgrillen, bør ein sørgja for at han er kald før ein kastar han. Det kan vera bra å kasta litt snø eller vatn på han. Ein bør sørgja for å ikkje hiva eingongsgrillen i lag med anna søppel. Det er nemleg ofte restvarme i eingongsgrillar som gjer at det kan oppstå brann, seier brannsjefen.

Forbode etter 15. april

Når det etter kvart vert tørrare i graset, må ein unngå open eld eller grill i utmark.

– Me ber alltid om at ein melder frå til vakttelefonen vår om bråtebrann. Me gjev ikkje løyve til noko, men vil gjerne ha informasjon, slik at me slepp unødige utrykkingar. Ein bør til dømes ikkje tenna bål på kveldstid. Det hender me kjem til bål etter at nokon har meldt frå om brann. Det er betre at folk har ein plan og gjev melding på førehand, seier Ones.

Det er lov å tenna bål i utmark fram til 15. april. Etter det er det eit generelt forbod mot aktiviteten.

– Me gjev ikkje løyve utover det. Folk har lov til å brenna hageavfall i hagen, men må ta omsyn til naboar. Det er ikkje lovleg å brenna andre ting enn naturprodukt. Det vil få reaksjonar viss me oppdagar det.

– Unngå beinbrot

I desse pandemitider må ein ta vare på kvarandre og ikkje ta uturvande sjansar, formanar brannsjefen.

– Me har inntil vidare normal beredskap i denne koronasituasjonen, og vonar me kan halda denne oppe, seier Ones.

Kan ein unngå å bryta beinet i påsken, så er det til hjelp og avlasting for helsevesenet, som dermed kan hjelpa fleire koronapasientar.

– Bruk sunn fornuft! oppmodar brannsjefen.

I forskrift om brannførebygging heiter det at ein pliktar å syna aktsemd ved gjennomføring av aktivitet som kan føra til brann. Det er forbode å gjera opp eld eller handtera brannfarlege gjenstandar utandørs under slike tilhøve eller på ein slik måte at det kan føra til brann. Eld må ikkje forlatast før han er heilt sløkt, seier forskrifta.

Det er i tidsrommet 15. april til 15. september forbode å gjera opp eld i eller i nærleiken av skog og annan utmark utan løyve frå kommunen. Kommunestyret sjølv kan gjennom lokal forskrift vika frå forbodet viss lokale tilhøve tilseier det. Det er likevel tillate å gjera opp eld der det openbert ikkje kan medføra brann, ifølgje lovdata.no.

– Hjelp oss å førebyggja

Varabrannsjef Mette Einang Vintertun seier i eit presseskriv at brannvesenet treng publikum si hjelp til å redusera faren for at brannmannskap skal verta smitta av koronaviruset.

– Me oppmodar deg som innbyggjar til å vera ekstra varsam når du driv med aktivitetar som potensielt kan føra til brann eller andre ulukker, seier ho.

Vintertun seier at når ingenting er som det plar vera, og kvardagen er heilt annleis enn normalt, er det viktig å hugsa på at det vert betre.

Sjølv om dagleglivet er sett på vent, må ein halda fram med å tenkja framover og vera godt budd.

– Me har eit mål om å i størst mogleg grad gjera det me vanlegvis gjer utanfor krisesituasjonen. Det er å førebyggja, verna og avgrensa skadane av brann, ulukker og miljøhendingar i lokalsamfunnet, seier varabrannsjefen.

– Ver budd

Brannvesenet oppmodar om at dersom du skal ut på vegen, så køyr varsamt. Ikkje gå frå kjøkenet medan du lagar mat, oppmodar Vintertun. Ta ein runde i huset før du legg deg. Gå topptur til fjells når det er trygt. Fyr i peisen på rett måte, med dei største vedkubbane nedst og dei minste øvst. Dette er berre nokre døme på kva som kan redusera risikoen.

– Målet vårt er at me skal hjelpa alle som treng oss, alltid! seier Vintertun.

Brannvesenet er difor avhengig av at mannskapa held seg friske. Brannfolka ber om at ein held avstand til dei når dei er ute på oppdrag for å unngå smitte.

– Vask hendene ofte

Viss brannalarmen går, bør ein trekkja ut av bygget, og ikkje stå i inngangspartiet. Dette bidrar til å redusera smitte mot mannskapa, men òg mellom innbyggjarane.

Den viktigaste oppgåva til brannvesenet er å verna og redda liv. For å kunna gjera dette, må brannfolka vera friske. Brannvernsleiinga gjer difor det ho kan for å halda oppe kritisk vernebuing og skapa uthald hjå mannskapa. Ei rekke smitteverntiltak er sette i gang på alle brannstasjonane. Det beste tiltaket er å vaska hendene ofte og grundig, seier varabrannsjefen.

Brannfolka kan koma på utrykking med meir verneutstyr enn vanleg. Dette er for å skjerma folket, men i tillegg for at dei ikkje sjølve skal verta sjuke.

Brannvernsleiinga tilrår alle at ein vaskar hendene grundig og ofte. Ein bør tørka av dørhandtak, tastatur og datamus med sprit. Det er viktig å ikkje spreia smitte vidare, og ein bør tenkja på dei risikoutsette gruppene i samfunnet – foreldre og besteforeldre, eldre og dei med kroniske sjukdomar.

– Det vert betre

– Alle må bidra til at me ikkje smittar. Syn solidaritet og gjer dei tiltaka styresmaktene ynskjer me skal gjera!

– Me ser fram til at me igjen kan stå saman, og gje kvarandre ein klem, men akkurat no er den beste måten å syna omsorg å halda avstand og ta vare på kvarandre. Alle burde oppleva seg sett, om det no er ein ven, besteforeldre som treng ein ekstra telefon, eller naboen du ikkje har sett på nokre dagar. Det er ei tung tid for alle, men saman kjem vi gjennom det, seier Vintertun.

– Når me no går inn i helga, ynskjer me at alle tek vare på kvarandre og syner solidaritet. Hald saman, og hald avstand! oppmodar brannvesenet.