Budsjett og kommuneplan: Den som ventar, får sjå

HF spurde tidlegare i veka partia kva endringar dei vil føreslå i budsjett- og plandebatten måndag. Det var for det meste lite å henta.

«Sjusete-kameratane» KrF, Sp og H har planar om å fremja eit felles framlegg, men kva det inneheld, må ein møte opp i formannskapet måndag for å finna ut. Partia skulle ha siste gruppemøte sundag kveld, etter at dei hadde eit tilsvarande møte på Øystese gymnas torsdag kveld, opplyser gruppeleiarane i Sp og KrF. H har ikkje svara på førespurnaden frå HF, send på e-post til gruppeleiarane torsdag. Det har heller ikkje SV eller V.

Av dei andre partia i heradsstyret har Frp, Ap og MDG svara HF. Borghild Storaas Ones (Ap) opplyser at budsjettframlegget frå administrasjonen er godt, og at Ap ikkje ser for seg vesentlege endringar. Kari Mostad (MDG) ynskjer eit grønare budsjett og vil vidareføra innspel frå 2016 om kjeldesortering i skular og barnehagar, og klimanøytrale bilar i Kvam herad. Frode Nygård (Frp) ser ikkje for seg store endringar, men ynskjer ei forsvarleg drift.

To seier tydeleg nei

HF har spurt partia om synet på pengar til fylling ved Hardangerbadet. Frp og Ap meiner det ikkje er rom for tiltaket, som har ein uviss kostnad.

Sp viser til at fyllinga er ein del av budsjettsaka, som altså skulle drøftast sundag kveld med H og KrF. Ordførar Jostein Ljones (Sp) sa før helga til HF at han ikkje ynskjer å løyva ein større sum til arbeidet i denne omgangen, men skaffa pengar til gransking av grunntilhøva.

MDG meiner fyllinga kan vera positiv for sentrumsområdet og kan vera villig til å finna pengar til tiltaket, men meiner det er viktig med regulering og gode grunngranskingar for å avdekkja miljøpåverknaden. Kvam herad må ta omsyn til at Hardanger Skyspace er plassert mellom anna med tanke på lystilhøva på staden, meiner partiet.

– Det vil vera pinleg å ikkje ta omsyn til dette ved ei eventuell utfylling, skriv Mostad.

Planspaning

HF har også spurt kva endringar partia seg for seg når kommuneplanen skal drøftast måndag, men også på det punktet var det lite konkret å få ut av dei folkevalde. Unntaket er MDG.

Herleif Tveit (Sp) opplyser at Sp vil returnera planen til rådmannen for å få eit betre dokument. Frp vil følgja opp tidlegare spørsmål om mellom anna byggjegrensa, stølsmiljø og planstatus for hytter. Ap har samarbeidd med Frp om ei relativt konkrete, overordna tinging til rådmannen.

MDG opplyser at partiet generelt ynskjer ein grønare plan. Konkret ynskjer partiet å fjerna nye byggjefelt på dyrka areal, fjerna industriområdet i på Neshalvøya og redusera industriområdet på Ljones.

Planutvalet har møte i Kvam rådhus i Norheimsund klokka 9 måndag. Formannskapet set seg til bordet klokka 10. På saklista til sistnemnde organ står mellom anna ny brannordning og brannstasjon, og legekontoret i Ålvik, attåt dei tidlegare omtala sakene. Hardangerbadet-saka er ikkje på saklista av di saka ikkje er ferdig utgreidd. Møta er opne.