Byter eigar og bygg

Hardanger kontorsenter AS får ny eigar og flyttar til det gamle lokalet til Åtgaum i Straumen senter.

Den nye eigaren er Angel Rosales, som allereie eig og driv leikebutikken Kozmos og Skoringen i senteret.

– Netthandel har gjeve oss meir og meir konkurranse dei siste åra. Dei seier jo at det er bra å ha mange bein å stå på. Først hadde me eitt bein med leikebutikken, så fekk me to bein med skobutikken og no får me det tredje beinet med kontorsenteret, fortel han.

Flyttar i helga

Rosales fortel at målet er å opna den nye butikken så snart som mogleg, men då HF snakka med han tidlegare i veka, var ikkje opningsdatoen klar.

– No er det ferie, og det kan vera vanskeleg å få tak i folk til å installera datasystemet og det andre me treng for å få butikken i gang. Sjølve flyttinga er planen å verta ferdig med i løpet av helga, seier han.

Rosales har kjøpt både namnet og varelageret til kontorsenteret. Om den nye butikken også skal heita Hardanger kontorsenter, hadde han ikkje bestemt då HF snakka med han.

– Me held truleg fram som Hardanger kontorsenter, men det kan også henda me byter til eit liknande namn, som til dømes Norheimsund kontorsenter, seier han.

– Hadde det for travelt

Hardanger kontorsenter i Torghuset hadde siste opningsdag onsdag. Den tidlegare daglege leiaren i butikken, Arild Solheim, fortel at tidsnaud er årsaka til at han valde å kvitta seg med butikken.

– Eg er lærar i tillegg til å driva butikken, og det vart rett og slett for mykje å gjera. Skal ein driva butikk, må ein gjera det skikkeleg. Det følte eg ikkje lenger at eg hadde tid til, seier han.

Han fortel at det er fire år sidan Hardanger kontorsenter vart opna. Den første tida heldt butikken til i Bruflatbygget, før det for eitt år sidan flytta inn i Torghuset.

Eigar av Torgbygget, Molina Mo, fortel at ho har store planar for dei tomme lokala.

– Der har eg tenkt å starta min eigen klinikk. Den skal heita Sunn og frisk, og eg skal praktisera teknikkar eg har studert dei siste 23 åra, fortel ho.

Allereie onsdag tek ho mot dei første kundane.

– Då arrangerer eg ein gruppetime om trening av indre organ. Etter kvart skal eg også utvida tilbodet, fortel ho.