Fyrste motsegn ved Kvamsøy

Fiskeridirektoratet har fremja motsegn mot akvakulturområdet sør for Kvamsøy.

Årsaka er at det kjem i konflikt med eit «nøkkelområde» i brislingfisket av regional og nasjonal tyding. Truleg vil oppdrettsanlegget kverrsetja heile det registrerte området som er registrert, meiner direktoratet.

Direktoratet var i juli i kontakt med ein lokal brislingfiskar. Vedkomande seier at området var viktig då brislingbestanden var større, og at ein del av brislingen som vert låssett ved Framnes, vert fiska i området. I tillegg har ein forskar ved Havforskingsinstituttet opplyst direktoratet om det vert observert ein del brisling i området når instituttet er på tokt i fjorden.

– Det er viktig at nøkkelområde for brislingen ikkje går tapa, slik at fisken ikkje kan koma tilbake til områda. Fiskaren me har hatt kontakt med, seier at det er spesielle straumforhold ved Kvamsøy som gjer at åte samlar seg her, og brislingen finn difor mat her, skriv direktoratet i fråsegna til kommuneplanframlegget.

Direktoratet ber dessutan om at ein registrert låssetjingsplass i Ljonesvågen vert teken inn på plankartet, og om at ein låssetjingsplass ved Kvamsøy vert definert som både frilufts- og fiskeområde.

Direktoratet krev ei føresegn som seier at det ikkje kan tillatast tiltak som er til ulempe for fiske i område som er avsette til slik aktivitet.

Tidlegare er det kome ei rekkje protestar mot planane ved Kvamsøy. Fråsegna det kanskje knyter seg aller størst spaning til, frå Fylkesmannen, er enno ikkje motteken. Statens mann har nemleg fått utsett fristen for innspelet til 15. september.