Kan vera på veg mot noko stort

Rossvoll volleyballklubb har fleire gode spelarar fødde i 2003. I år skal dei møta eldre motstandarar. Det håpar klubben skal førebu dei til store ting i framtida.

Det fortel leiar i klubben Eilev Nyland.

– U17-laga er ei stor gruppe som er flink til å trena. Laga våre består for det meste av spelarar fødde i 2003, medan mange av motstandarane stiller med spelarar fødde i 2002. Eitt år betyr litt for denne aldersgruppa, og me trur det at dei får bryna seg på eldre spelarar, skal gjera at spelarane tek store steg og verta eit lag som kan hevda seg i toppen til neste år, seier han.

Som ein del av sesongoppkøyringa arrangerer Rossvoll denne veka sommarleir for spelarar i Hordaland volleyballkrins. 40 spelarar har meldt seg på. 14 av dei er lokale.

Ein utviklingsklubb

Nyland seier at Rossvoll ser på seg sjølv som ein utviklingsklubb. Klubben har eit seniorlag, men satsar mest på dei unge spelarane. Ei årsak til dette er at mange flyttar frå Kvam når dei er ferdige med den vidaregåande skulen, og dermed vert det vanskeleg å få eit sterkt seniorlag.

For dei aldersbestemde laga er kanskje serien i Hordaland og regionmeisterskapen dei viktigaste turneringane. Regionmeisterskapen, ikkje minst, fordi den er ei kvalifisering til noregsmeisterskapen som vert arrangert til våren.

– NM er for dei 16 beste laga i kvar klasse, og det heng høgt å få plass i turneringa. For nokre av laga våre er det eit naturleg sesongmål å kvalifisera seg til NM. For andre er sesongmålet å gjera det bra i dei regionale turneringane i Hordaland, seier han.

Rossvoll hadde ein gyllen generasjon for nokre år sidan. Ei gruppe spelarar, dei fleste fødde i 1995, vann NM både då dei var G17-spelarar og då dei vart G19-spelarar i tillegg til å rykka opp til eliteserien i volleyball. At 2003-årgangen skal nå same nivå, kan ikkje Nyland garantera.

– Eg trur det kan verta vanskeleg for G17-laget å nå NM i år. Til neste år er moglegheitene betre. Eg trur både J19- og J17-laga har betre moglegheiter til å nå NM i år, eg ser heller ikkje bort frå at J15-laget kan ha ei moglegheit. Me tenkjer eigentleg ikkje så mykje på NM no. Det må me ta litt som det kjem. Me trenar, spelar og ser kva som skjer. Fokuset vårt er på utvikling og ikkje på resultat. Gode resultat kjem gjerne av god utvikling, seier han.

God rekruttering

Volleyballsesongen startar for alvor i september. Nyland seier det framleis ikkje er klart kva lag klubben stiller med i år.

– Målet vårt er at me skal få lag i alle aldersklassar for begge kjønn. Det har me god tru på at me skal få til. Rekrutteringa til klubben er bra. Volleyball er ein stor idrett i Øystese, og det er eit jamt tilsig av nye spelarar. Ser ein på talet på spelarar, er klubben er blant dei to til tre største volleyballklubbane i Hordaland, seier han.

Nyland skryter av samarbeidet klubben har med Kvam vidaregåande skule.

– Det at skulen har volleyball som toppidrettsfag, legg forholda til rette for at unge kan satsa på volleyball også etter at dei byrjar på vidaregåande skule. Gjennom faget får dei tre treningsøkter i veka i skuletida. Mange klubbar opplever at spelarane sluttar når dei når den alderen. Når spelarane kan bruka delar av skuletida til å trena, og slepp å trena så mykje volleyball på fritida, vert det lettare å satsa, seier han.