Kunnskap eller mangel på kunnskap om oppdrett og kommuneplanen

– Skal industrien vekse vidare, må det stillast liknande krav som andre bransjar etterlever, skriv Klaus Rasmussen og Oddvar Soldal i Naturvernforbundet.

Naturvernforbundet i Kvam er ikkje imot oppdrettsindustrien, men ser at næringa slit med å vurdere sitt eige fotavtrykk. Skal industrien vekse vidare, må det stillast liknande krav som andre bransjar etterlever.

Det er mange kjente akademiske miljø som forskar på dei negative/positive sidene ved den store oppdrettsveksten sidan 80-talet. Nokre av desse vert kvart år inviterte til «Hardangerfjordseminaret». Seminaret er blant dei fremste nasjonale møteplassane for kunnskap og forsking på laksefisk, og samlar brei støtte i forskarmiljøet.

Stoda i Hardangerfjorden for villaksen og sjøauren er alarmerande. Nedgangen har sidan 70-talet vore konsekvent, og det er i dag stengt for all fiske av villaks.

Fiskerimyndigheitene har merkt Hordaland og Hardanger med «raudt ljos».

Ingen får utvide oppdrettsproduksjonen før tilstanden i fjorden er tydeleg betre.

• Les også: Lingalaks: – Mindre lus enn folk trur

Me vil kort referere til enkelte føredrag på årets seminar som sterkt underbyggjer behovet for styring av nye konsesjonar og ikkje støttar kravet om oppdrett ved Kvamsøy. Alle finn du på nettet.

• Arrangøren: – Saknar fleier politikarar

Problematikk og fakta om oppdrett i Hardanger:

• Meir enn 30 % av villaksen som finn vegen inn fjorden, døyr av for mange lakselus.

• Villakssmolt og småaure «slit» med turen til havet på grunn av luseinfeksjonar og vert gåande nær elvane for å reinse seg i ferskvatnet

• Det er størst lusetrykk i vekene med høg vasstemperatur.

• Mange hundre gonger større smittepress av lus enn før oppdrettsveksten på 80-talet.

• Bestanden av sjøaure og laks i Hardanger er for svak til å tole fiske.

• Oppdrettsnæringa står for meir enn 65 % av bestandsreduksjonen av villaksen.

• Kvar laks fører til koparutslepp lik ein 50-øring. Kopar brukast på nota. I 2017 var det produsert 400 millionar laksefisk.

• Alle lokalitetar i Kvam hadde over gjennomsnittet i koparutslepp. Tveitnes Ytre Ålvik er markert verst.

• Rømt oppdrettslaks har gen-infisert minst 30 % av villaksen.

• 2/3 av alle norske lakseelvar er geninfiserte av oppdrettslaks.

Oppdrett ved Kvamsøy er uaktuelt på grunn av:

1. Kvamsøy og fjorden er eit nasjonalt viktig landskap.

2. Oppdrett midtfjords vil danne liknande presedens/krav i andre kommunar.

3. Overgangen til framtidsretta lukka oppdrett vert utsett.

4. Hardangerfjorden toler ikkje meir oppdrett, jf. «raudt ljos».

Arealet næringa ynskjer ved Kvamsøy, er eit fellesareal for alle hardingar.

Naturvernforbundet i Kvam

Klaus Rasmussen og Oddvar Soldal