Ikkje nøgd med bominfo

Kvam Frp er ikkje nøgd med informasjonen som ligg føre i bompengetakstsaka til heradsstyret onsdag. Partiet meiner framlegget om nye takstar er uoversiktleg, og påpeikar at kostnaden vil auka for mange som passerer bomstasjonane til aktivitetar og arbeid. Frp meiner det må vera mogeleg å få eit meir forståeleg oversyn som gjer det enklare å sjå følgjene for brukarane.

Frp viser dessutan til at Statens vegvesen i eit skriv opplyser at styringsgruppa i Kvammapakken kan ta ut meir vegproduksjon enn den stortingsvedtekne ramma. Gruppeleiar Frode Nygård (Frp) meiner dette er feil, og viser til at stortingsproposisjonen slår fast at vegbygginga til tilpassast ramma på 440 millionar 2009-kroner. Nygård krev dokumentert at ramma, som var ein føresetnad for lokal støtte, er halden. Han meiner dette er viktig av di den føreslegne takstordninga kan føra til at inntektene aukar.

Som HF har opplyst, vil formannskapet seia nei til den nye ordninga. I ettertid har vegvesenet opplyst at eit avslag vil føra til at Kvam herad må dekkja eventuelle ekstrakostnader med å driva ei eiga ordning i Kvammapakken. Heradsstyret avgjer saka onsdag.