Jondal slår seg saman med Odda og Ullensvang

Med ni mot åtte røyster sikra Ap, H og KrF snuoperasjonen, etter at Sp sikra det same fleirtalet motsett veg i juni.

Debatten og argumenta om sjølve samanslåingsspørsmålet var i stor grad den same som den gongen, men var ikkje det som stal mest av taletida i gymsalen på Jondal skule onsdag kveld.

Mange var opptekne av det som har skjedd etter møtet i juni og som førte til at saka vart teken opp att. Ap, KrF og H fekk sterk kritikk for at dei overhøyrer 50,4 prosent av folket.

Utsetjing vart avfeia

Fleire i Sp tok til orde for å utsetja saka og skipa til ei ny og forpliktande folkerøysting med berre to alternativ: for eller mot samanslåing. Det er i tråd med oppmodinga i eit ope brev til politikarane frå ni personar.

Terje Grøtt (Sp) føreslo ny folkerøysting, og ville endåtil vedta å binda kommunestyret til å følgja rådet i folkerøystinga. Det er i praksis ikkje mogeleg, for slike røystingar er rådgjevande, og kommunestyremedlemene står alltid fritt til å røysta slik dei ynskjer.

Framlegget fall uansett med dei same ni mot åtte røystene som resultat i røystinga.

Helst rolege former

Gymsalen var nesten fullsett, men møtet gjekk føre seg i fredsæle former. Før møtet var det berre eitt skilt å sjå utanfor på skuleplassen, i sterk kontrast til den organiserte demonstrasjonen utanfor Jonsvoll då same sak vart drøfta i juni.

Skilteigar Kyrre Brekke støtta samanslåinga med teksten ”Ja til Ullensvang”.