Alvor for kultur- og idrettslivet i Vestland fylke!
Fredag før påske hadde hovudutval for kultur, idrett og integrering i Vestland fylke sitt første nettmøte, der koronakrisa sto i fokus. Kultur- og idrettslivet har avlyst eller er i ferd med å avlyse mange arrangement og vil miste viktige inntektskjelder. Krisepakken på 900 millionar frå regjeringa til idretten, frivillig sektor, medrekna 300 millionar til kulturlivet, er ein god start, men ikkje tilstrekkeleg til å sikre faste utgifter og likviditetsutfordringar. Dette vil forsterke seg utover våren og sommaren, som er høgsesong for t.d. utstillingar, museumsbesøk, idrettsarrangement, konsertar og festivalar.
På dette møtet foreslo eg på vegner av Raudt Vestland:
Artikkelen held fram under annonsen.
«Fylkesdirektøren får i oppgåve å invitere alle kommunane i Vestland fylke til å sende inn ein oppdatert oversikt over den vanskelege situasjonen innan kultur- og idrettslivet i eigen kommune snarast råd. Dette blir ein del av kartlegginga fram til neste utvalsmøte.»
Dette vart samrøystes vedteke. Det neste møtet er alt 21. april. Eg oppmodar difor kultur- og idrettslivet og frivillig sektor i heile Vestland fylke om like etter påske å sende inn via eigen kommune ein dokumentasjon på korleis koronakrisa rammar dei konkret på kort og lengre sikt.
Då vil vi som fylkespolitikarar bli betre i stand til å meisle ut ein god politikk for å hjelpe kultur- og idrettslivet i ei vanskeleg tid.
