Millionar til Trolltunga-stien
Miljødirektoratet løyver 1.900.000 kroner frå tilskotsordninga Nasjonale turiststier til Trolltunga i Ullensvang.
Mange av stadene som får støtte, har utfordringar med å handtera det store talet besøkande på ein god og sikker måte, skriv direktoratet i ei pressemelding.
– Me er glade for at mange av dei som har søkt, ønsker å utvikla besøksstrategiar for områda sine. Slike strategiar er eit godt verktøy for å legga til rette for å styra og handtera besøket på ein god måte, vareta naturen og legga til rette for brei verdiskaping i lokalsamfunna, seier direktør Ellen Hambro i Miljødirektoratet.
Artikkelen held fram under annonsen.
Direktoratet fekk inn søknader om 35 millionar kroner. Tilskota var på totalt 12 millionar kroner og gjekk til 14 turistattraksjonar. Trolltunga var mellom prosjekta som fekk mest støtte.
Talet på besøkande, delen internasjonale gjester og geografisk spreiing har vore vektlagde moment i tildelinga.
