Det er ikkje Zalando, Boozt.com eller Amazon som støttar opp om Sjusete-løypa, fotball og festivalar

Kunnskap om korleis «alt heng saman» er viktigare no enn nokon gong

Koronapandemien herjar og grip sterkt inn i dagleglivet vårt. Ja, det kjennes nesten ut som det er unntakstilstandar i landet om dagen. I lojalitet til myndigheitene og i solidaritet med dei svake gruppene som smitten kan råka hardast, innrettar me oss etter strenge restriksjonar for å unngå spreiing av viruset som fører til den frykta lungesjukdomen. Butikkar har tilrettelagt med ulike hygienetiltak og vernande plastskjermar, og oppmodar om å halda avstand til andre kundar i lokalet. Me går alle gjennom eit scenario me ikkje har sett maken til i vår tid.

«Landet har fått kraftig slagside»

Slik uttrykte finansministeren seg nyleg på Dagsrevyen då han kunngjorde tiltak som skulle vera til hjelp for dei hardast råka næringane. I same sendinga melde Post Nord om ei mangedobling av pakkelevering til heimeadresser som fylgje av auke i netthandelen. Det faktum at handel på internett har hatt ein slik eksplosiv auke den siste tida, fører også til at pengar no «renn i strie straumar» frå lokalsamfunn til utanlandske nettgigantar med milliardomsetning, medan lokalt næringsliv risikerer å gå under. Dette er ei alvorleg utvikling som kan få omfattande følgjer for lokalsamfunna våre.

Felles ambisjon og lokalt samspel

Handelsnæringa er samansett av små og store aktørar som er avgjerande for eit levande lokalmiljø, og mange «har lite å gå på» før det kan bli snakk om å stengja. Våren, som er årstida for fornying, er ein sesong mange er avhengige av for å oppretthalda drifta framover. Dei må no setja sin lit til lojalitet frå lokale kundar, og det er difor ei felles sak å halda hjula i gang i slike krevjande tider. Då kan det framleis vera sommarjobbar å få, basargevinstar å sanka og viktige tilskot til frivillige lag å henta. I fellesskap må me syta for at me har eit levande lokalsamfunn med trygge arbeidsplassar og eit mangfald av tenester og vareframbod som gagnar oss. Då kan festivalar, lag og organisasjonar framleis rekna med det lokale næringslivet som gode støttespelarar. Husk at det er no det skjer!

Mi oppmoding er at kvar og ein tenkjer over: Korleis vil me ha det der me bur?