Folk puslar som aldri før

Pandemiar kan føra med seg nye farsotter.

Marit Sigrunn Laupsa Huus, dagleg leiar i Huus Bokhandel AS, fortel etterspurnaden etter puslespel har eksplodert etter at koronaviruset kom til Noreg.

– Me er heilt tomme for puslespel. Det same er leverandøren vår, så me har ikkje fått tak i nok. Det skal koma påfyll etter påske. Bokhandlar i heile landet opplever det same, seier ho.

– Merkar at mykje er stengt

Interessa for brettspel har òg auka. Det same har etterspurnaden etter teiknesaker. Dessutan er det framleis ein jamn straum med kundar som kjøper kriminallitteratur og andre bøker til påske. Likevel merkar Huus at færre kjem til butikken. Huus bokhandel har, som mange andre, redusert opningstidene.

– Me merkar at mykje er stengt rundt oss. Hardangerbadet og Hardangerfjord hotell er stengt og hyttefolk held seg heime. Hyttefolk som handlar, plar vera ei god inntektskjelde i påskeveka. Slik vert det neppe i år, seier Huus.

Ho driv butikken sjølv og har ikkje måtta permittera.

Mange kjøper leiker

Angel Rafael Rosales Mejia eig og driv både leikebutikken Kozmos, Skoringen og Kontorsenteret i Straumen senter i Norheimsund. Han fortel at kundane knapt kjøper ein sko for tida. Interessa for kontorrekvisita er heller ikkje stor. I leikebutikken andsynes skobutikken er det monaleg meir å gjera.

– Aktiviteten i leikebutikken har vore om lag som vanleg, men kundane kjøper litt andre ting enn dei plar. Me sel mange puslespel, mykje lego og mykje teikne- og måleutstyr. Det er ikkje så mange born i butikken som det plar vera. I staden er det vaksne som handlar pakkar til borna, fortel han.

Også Rosales fortel at påsken plar vera travel. Slik tvilar han på om det vert i år. Butikkane har permittert fleire tilsette. Rosales fortel at han håpar å sleppa fleire permitteringar.

– Eg treng litt tid til det administrative arbeidet, og håpar eg slepp å driva butikkane heilt åleine, seier han.