Smakspanel utgått på dato

Brukarpanelet som har hatt i oppgåve å vurdera kvaliteten på maten som mange seniorkvemmingar får levert frå Matvarehuset i Olsvik, er ikkje gyldig etter det konstituerande heradsstyremøtet 15. oktober.

Det opplyser rådmann Anita Hesthamar i eit svar til Marit Heidi Seim, som er medlem av rådet for menneske med nedsett funksjonsevne og eldre i Kvam. Seim etterlyste planen for det vidare arbeidet i brukarpanelet. Ho vart vald til å sitja i brukarpanelet i eit heradsstyremøte i oktober 2018.

Heradsstyret bad i eit vedtak om løypemeldingar i samband med arbeidet i gruppa.

– Etter dette er eg vorte innkalla til eitt møte. Dette vart halde våren 2019. Eg har undervegs bede om at det vert laga ein plan for arbeidet og oppsett aktuelle møtetider. Eg har òg kome med framlegg til arbeidsmåtar. Då det ikkje er kome tilbakemelding, kan det sjå ut til at ingenting er skjedd, skriv Seim.

– Kva skjer i denne saka? spør ho.

Rådmannen svarar at Matvarehuset i september tok kontakt med administrasjonen og ynskte å invitera brukarpanelet til Bergen for omvising og smaksprøving i veke 43. A2G kunne òg stilla.

Dette var administrasjonen positiv til, men så viste det seg altså at noverande brukarpanel berre var gyldig fram til det omtalte heradsstyremøtet.