– Ver gniten med vatnet!

Vassforbruket må ned i Kvam, meiner teknisk sjef Lars Ese Ur.

– Inntak av vatn er sunt og viktig i det varme vêret. Vask av bilar, terrassar og vatning av plenar er ikkje det.

Ur oppmodar på den kommunale heimesida om å spara på vatnet. Ein lang periode utan regn, og vêrmeldingar som ikkje varslar ein drope den neste veka og vel så det, får han til å finna fram sparekniven.

Ifølgje Ur har forbruket av vatn auka monaleg, noko som skapar problem for vassforsyninga. Ikkje minst kapasiteten i reinseanlegga byrjar verta kritisk.

Ur oppmodar om å styra unna vatning av plenar, fylling av basseng og andre vasskrevjande aktivitetar. Gode tiltak er å vøla kranar og toalett som lek.

Vert ikkje forbruket redusert, kan det verta innført restriksjonar, åtvarar Ur.

Han viser til at abonnentvilkåra for vatn og avløp pålegg folk å ikkje sløsa med vatn. Om det vert innført restriksjonar, har ingen rett til erstatning eller prisavslag.

Frå før har brannsjef Bjørn Johansen innført forbod mot open eld utandørs. Det same har brannsjef Georg Kvåle i Jondal gjort.