Positiv til Ungdomsheimen-tiltak
Kvam herad har sendt søknaden om riving av Ungdomsheimen og bygging av nye fritidshusvære på høyring. Rådmannen skriv at han meiner føremonene med tiltaket er klart større enn ulempene. Fritidsbustadene trengst, utbygginga er positiv for næringslivet, og det er ein stor fordel at Ungdomsheimen vert riven, meiner ho.
Rådmannen meiner det er uheldig å ikkje retta seg etter kravet om reguleringsplan og rekkjefølgjekrava som gjeld trafikk i kommunedelplanen, men meiner utbygginga er løyst godt med tanke på trafikkregulering. Utsiktstapet ein granne vil få, er til å leva med, og ein må rekna med høg utnytting på ei tomt som er regulert til byggjeområde, meiner rådmannen. Ho synest bygningane er godt utforma og har gode visuelle kvalitetar, og viser til at tiltaket fører til marginale terrenginngrep.
I høyringsbrevet skriv rådmannen at ho framleis ventar på ei avklaring frå vegvesenet i samband med søknaden frå Kvamskogen næringslag om ein forenkla gang- og sykkelveg frå Ungdomsheimen til Kvamskogen landhandleri.
Området ved Ungdomsheimen er i kommunedelplanen definert som senterområde. Rådmannen minner om at dersom den planlagde tunnelen forbi Tokagjel fører til at området ikkje vert liggjande ved fylkesveg 7, vil senterfunksjonen verta mindre aktuell. Bygging av små fritidshusvære, parkeringsområde og felles uteareal ser ho såleis på med glede.
