Øystese ute av Norway cup

Norway cup-eventyret er over for gutar 16-laget til Øystese fotball. Os vart for sterk og vann til slutt 7–1 då laga møttest i 64-delsfinalen tidlegare i dag.

For gutane frå Øystese har det vore ei turnering med oppturar og nedturar. Sundag slo laget Åheim/Vankam 4–0, før måndagens kamp mot Bryneset IL enda 0–0. Tysdag vart det 0–3-tap for somaliske Waryaa FC. Trass tapet kapra Øystese 2. plass i si gruppe og gjekk vidare til A-sluttspelet, der laget frå Os venta.

– Me vart eit nummer for små mot Os, men det skulle berre mangla. I vårserien kom Os på 2. plass i 1. divisjon, medan me kom heilt sist og rykte ned frå 2. divisjon, seier Øystese-trenar Ola Fjerdingen.

Trass tapet i 64-delsfinalen ser Fjerdingen på resultata i Norway Cup som ein opptur.

– Sigeren i den første kampen smaka godt etter ein tung vårsesong. Det er også oppløftande at me ikkje sleppte inn mål på dei to første kampane. Sjølv i kampen mot laget frå Somalia synest eg me gjorde ein god figur. Det somaliske laget hadde raske og tekniske spelarar. Me satsa på å vera aggressive i presset og lukkast godt, sjølv om kampen enda med tap. I alle dei tre kampane i puljespelet viste gutane ei positiv side. Dei arbeidde hardt og stod på. Dette er lærdom me skal ta med oss når haustsesongen startar i slutten av august, seier han.