HF får ny drakt

HF satsar på både det nye og det gamle.

Du har kanskje lagt merke til endringane, anten du les dette på nett eller papir. Ny nettside er eit resultat av samarbeidet HF har inngått med Agderposten Medier AS. Den nye bladbunaden, som har «premiere» fredag, har grafikar i HF, Kristina Sofie Kvåle, stått for.

Ingen sirkusfargar

Kvåle er oppteken av at papiravisa skal vera godt leseleg, med moderne fontar og eit moderne uttrykk. Ho har henta inspirasjon frå både gammal, tradisjonell avisdesign og moderne magasin, mellom anna eit om flugefisking.

– Me brukar ikkje sirkusfargar og har ikkje ei brautande, tabloid framside. Det skal vera eit lekkert design som er ei modernisering av det tradisjonelle, seier ho.

Sørlendingen Kvåle byrja å jobba i HF i 2017 etter å ha utdanna seg innan grafisk design på Norges Kreative Fagskole og Westerdals Oslo ACT. Bladbunadprosjektet har følgt henne sidan starten, sjølv om det lenge har lege på is. I mellomtida har ho dessutan laga magasinet Bygdalangs. Tanken er at magasinet og avisa skal sjå ut som søsken, seier Kvåle.

Spent på reaksjonar

Det er ein stressa grafikar som svarar når HF ringer. Ho både gler og kvir seg til den nye papiravisa skal lanserast, og legg ikkje skjul på at ho er oppteken av korleis nyvinninga vert motteken.

– Eg er veldig stressa. Eg vurderer å byrja å snusa igjen, seier ho.

– Avisa er noko mange har eit forhold til. Eg føler litt at eg kjem heim i folk si stove og seier: «Slik skal det vera no». Eg ser for meg at bingobanden kjem etter meg på butikken.

– Du har tidlegare omtala Bygdalangs som borna dine. Kjenner du det same for den nye bladbunaden?

– Ja! Det er noko eg har skapt sjølv, men samstundes er det ein kopi av noko som allereie har vore. Eg er ikkje einaste hjernen bak, seier ho.

– Den gamle avisa er sædcella som du har bore fram og utvikla i månadsvis?

– Ja. Men det er dine ord.

Løfter fram lesarane

Det er ikkje snakk om omfattande endringar i innhaldet i papiravisa. Kjende og kjære element, som «Hi sio», «Baksio» og «Refleks», vert med vidare. Den største endringa – utanom det estetiske – er at debattspaltene vert flytta fram.

– Me ønsker å gi lesarinnlegg ein meir profilert plass, med luftigare, større og meir lettlesne sider, fortel redaktør Sigbjørn Linga.

Han trur lesarinnlegg – i alle fall av lokale skribentar – er populære. Då er det ingen grunn til å gøyma dei vekk. Etter kvart skal HF dessutan lansera nye, faste spaltistar.

– Me er på jakt etter fleire gode skribentar. Me veit ikkje om alle sjølve, seier Linga.

Linga synest det er ei lette å få på plass ny avis både på papir og nett.

– Eg er glad for at me har ein rasande dyktig grafikar på huset, som har jobba veldig godt med å planlegga korleis dette skal sjå ut. Det er ikkje mykje som ikkje er gjennomtenkt frå hennar side, seier han.

Også den nye nettsida er han nøgd med. Ho ser betre ut og er lettare å navigera i, med nokre nye element, til dømes oppdatert lokal vêrmelding og ei fortløpande oppdatert eigedomsteneste.

Drøymer om Liverpool-avis

Den nye nettsida gjer det lettare for lesarane å navigera ut frå kva dei er interesserte i. Saker vert i større grad kategoriserte etter kategoriar, tema, geografi, personar og organisasjonar. Etter kvart som nettavisa får meir nytt stoff, vil kategoriane fyllast opp.

Journalistane får dessutan betre løysingar til å bruka alt frå faktaboksar og sitat til fleire bilete, grafikk og eksterne element.

– Det vil verta betre innhald og fleire element på nett enn det har vore. Sakene vert lekrare og lettare å lesa. Me håpar lesarane set pris på det. Me har investert mykje pengar i dette, både for oss og for lesarane, seier Linga.

Heile avisproduksjonen vert no skybasert, i staden for at stoffet er lagra på lokale tenarar på kontoret i Norheimsund. Linga kan dermed sitta og laga avis kor som helst i verda.

– Draumen må vera å sitta i Liverpool og laga avis etter å ha sett laget knusa Manchester United 3–0. Då vert det ei avis med mange gladsaker, seier Linga.

Meir til stades

Eigar og dagleg leiar Camilla Skaar Ljones håpar folk brukar tid på å studera den nye nettsida, og gir tilbakemelding om ting dei meiner burde vore betra.

– Tanken er at me skal verta flinkare digitalt. Samstundes bryr me oss om papiravisa. Difor har me lagt ned eit arbeid i å friska henne opp. Me har hovudinntektene våre i papiravisa, og ho er det viktigaste produktet me har, seier Ljones.

Samstundes er avisa nøydd til å vera på ballen digitalt for å få med dei yngre generasjonane.

Etter kvart vil det verta lansert ein ny app for både e-avis og ferske nyhende. Appen ventar på å verta godkjend av Apple. Forhåpentlegvis er han på plass over påsken.

Appen gir mellom anna høve til å få push-varsel om nye saker.

– Om ein er digital brukar, vil ein oppleva at me er meir til stades, seier Ljones.

Alle kundar har fått nye kundenummer. Difor må alle oppretta nye digitale kontoar. Abonnentar som har registrert ei e-postadresse, vil få tilsendt ei lenke med påloggingsinformasjon, fortel Ljones. Andre må ta kontakt på e-post for å få tilsendt nye kundenummer.

Den første tida vil alle saker på nettsida vera opne for alle.

– Litt for at folk skal få tid til å registrera seg, men også for å visa fram den nye sida. Kanskje har nye gjester lyst til å abonnera? seier Ljones.

God taiming

Lanseringa kjem på eit spesielt tidspunkt. Medan samfunnet elles stoppar delvis opp, har det vore hektisk både på heimekontor og i HF-lokala.

Linga meiner det har vore hell i uhell for HF.

– Når me «slepp» fotballkampar, konsertar og liknande på kveldstid, har me fått høve til å få dette på plass no.

I og med at det skjer lite i samfunnet, og at det har gått mykje tid til opplæring og førebuing, vert den første nye avisa berre på 16 sider.

– Me kjem sterkare att når ting er i gjenge att og produksjonen normaliserer seg, lovar Linga.

Også Ljones påpeiker at me er inne i ei annleis tid.

– Dette viser kor viktig det er å vera digital når slike ting skjer, seier ho.