Smittevernordre til Norhand
Norhand industri AS skal sy 2.500 smittevernfrakkar.
Oppdragsgjevarane er Bergen kommune og Haraldsplass sjukehus. Avdelingsleiar i Norhand, Lars Kristian Bu, fortel at Norhand er ein del av Victoria gruppen AS som har hovudkontor i Godvik. Det var gjennom Victoria gruppen verksemda fekk oppdraget.
– No arbeider dei tilsette i systova vår på spreng med å sy frakkar så raskt. Dei åtte tilsette plar ha fri i påsken. Slik vert det ikkje i år. For oss er det viktig å bidra sidan trongen for smittevernutstyr har auka dramatisk. Me har det naudsynte utstyret og kompetansen, seier han.
Artikkelen held fram under annonsen.
Norhand spesialiserer seg på å sy arbeids- og verneklede til smelteverksindustrien. Bu seier at den nye ordren ikkje skal gå ut over dei andre kundane.
– Me skal levera dei ordrane me har, men kjem til å sy mindre til lageret så lenge frakkesying held på, seier han.
Norhand freistar å følgja smittevernråda frå styresmaktene i systova. Verksemda prøver å ha minst to meter mellom dei tilsette. Det er plassert ut både sprit, eingongshanskar og ansiktsmasker.
