Gje næringslivet ei hjelpande hand – om du kan!

Det er harde dagar for både næringslivet og dei fleste av oss privatpersonar i desse korona-tider. Mange er permitterte frå jobb, dei fleste bedrifter har nedgang i omsetning, og mange har vorte tvinga til å ha heilt stengt. Dersom dette varer lenge, er eg redd fleire bedrifter vert avvikla. Særleg ille er det for reiselivet og andre firma som har vorte pålagde å stenga dørene. Statlege hjelpepakkar kan nok redda mange, men ikkje alle.

Det er heldigvis ikkje alle som treng vera redd for at arbeidsplass og eigen økonomi er i fare. Offentleg tilsette og pensjonistar kan trygt sjå fram til sikre inntekter og at renteutgifter på lån vert redusert, men me er alle avhengige av at næringslivet rundt oss overlever og kan gje oss dei tenester og den service som me treng. Derfor bør alle me som har høve til det, sjå om me no kan vera med på ein dugnad: ta ei oppgradering av hus og hage no, bygg ein ny mur eller veg, lag eit nytt bad eller kjøkken og kjøp desse tenestene hos eit lokalt firma! Me treng klede og sko slik som før, og så snart det vert opning for det, går me ut på kafé og kjøper tenester for både kropp og sjel.

Tenk deg godt om før du legg inn neste tinging av varer på Internett! Kunne du fått dette lokalt og dermed vore med og sikra nokre arbeidsplassar her i bygda? Den store utanlandsferien i sommar vert det neppe noko av, men det treng ikkje skapa krise i heimen. Her er mange gode alternativ til å bruka ferien både lokalt her i Hardanger og elles i Norge.

Det er grunn til å vona at dei strenge korona-tiltaka kan lempast på utover våren, men det kjem til å ta lang tid før det vert tilnærma normale tilstandar. Me må halda ein viss avstand til kvarandre og me må vera ekstra flinke med handvask. Verre er det med dei som ikkje har ein arbeidsplass å gå attende til når det verste er over. Gjer det du kan for at desse blir så få som mogeleg!