Broderleg slit rundt Fyksesund

Nokre av deltakarane i Fyksesundet rundt går for å vinna. For andre er det viktigaste å slå «broderen».

Slik er det for brørne Roger og Odd Arne Botnen. Roger er ein Fyksesundet rundt-veteran og har delteke alle dei fire gongene løpet har vore arrangert, medan Odd Arne deltok for første gong då årets utgåve vart arrangert laurdag.

Før starten hadde dei annonsert at dersom dei kom mot mål samstundes, var det ikkje aktuelt å gå over målstreken saman. Denne gongen var den eldste eldst. Eldstebror Roger kom i mål om lag førti sekund før veslebror Odd Arne. Brørne vart nummer fem og seks.

Kniving førte til blodslit

– Eg trur dette er det verste eg nokon gong har vore med på. Det var heilt forferdeleg. Eg har aldri gått så fort før og sette ny personleg rekord med om lag ein halv time. Me var fem kameratar som gjekk saman. Alle har eit ekstremt konkurranseinstinkt, og då måtte det berre bli vondt, fortel Roger Botnen.

Dei andre i kameratgjengen vart for sterke, men han kunne i alle fall gle seg over å slå broren.

– Det gjorde godt. Eg skal nok passa på å hovera til han eventuelt slår meg ein gong, fortel Roger.

Odd Arne fortel at han la opp til det han kallar ein Petter Northug-taktikk, der han tok det litt med ro i motbakkane og spurta det han kunne i nedoverbakkane. Avstanden mellom dei to brørne var aldri større enn tre til fire minutt. Yngstemann flytta beina raskast den siste delen av løpet.

– På veg ned passerte eg ein kar som var på tur med hunden. Han fortalde at Roger hadde passert om lag tre minutt tidlegare, men at han såg verre ut i beina enn eg gjorde. Så då tenkte eg at eg kanskje kunne klara å ta han att, men det vart berre nesten, seier Odd Arne.

Brørne ser ikkje bort frå at det vert ein ny duell neste år.

– Det er no det byrjar. No skal me faktisk byrja trena til dette. Neste år blir det kanskje første- og andreplass me knivar om, seier Roger.

– I alle fall så lenge det ikkje melder seg på nokre storsusarar som spring på like over seks timar. Gjer det det, har me eit problem, seier Odd Arne.

– Nøkkelen er å eta

Per Arne Aadland frå Samnanger vann Fyksesundet rundt 2018. Han brukte 7 timar, 24 minutt og 9 sekund på den 52 kilometer lange turen. Eirik Kvarv vart raskaste kvemming. Han fullførte på tida 7.37.23.

– Me var ei lita gruppe som gjekk saman lenge. Eg la meg bak personar som er kjende i området, slik at eg slapp å bruka tid på å navigera. Det gjekk veldig fort, og eg gjekk berre og venta på at eg skulle gå på ein knekk. I staden var det dei andre i gruppa som byrja sakka akterut, og dei siste par mila skjøna eg at plasseringa kunne verta bra om eg berre klarte å unngå krampe. For meg er tida viktigare enn plasseringa. Målet mitt var å koma under åtte timar, og det klarte eg med meir enn 20 minutt. Med den tida hadde eg vore nøgd same kva plassering eg hadde fått, seier han.

Kvarv trur store mengder mat og drikke undervegs er ein nøkkel når ein skal gå langt.

– Eg tvinga i meg mat og drikke sjølv om eg ikkje hadde lyst på noko. I fjor var eg tyngre då eg kom i mål enn då eg starta. Det er eg truleg i år òg. Når ein et så mykje, går ein i alle fall ikkje tom for energi, seier han.

Skryt til arrangøren

Aadland fortel at det er tredje gong han deltek i Fyksesundet rundt, men første gong han vinn løpet. Han sette ny personleg rekord med om lag ein halv time.

– For meg er det stort å vinna. Kvifor eg slo min eigen rekord med så mykje, er vanskeleg å seia. Eg har ikkje trena meir enn eg plar, så det kan henda det rett og slett har med rutine å gjera. Denne typen løp handlar mykje om å disponera kreftene rett, seier Aadland.

Vinnaren nytta også høvet til å koma med lovord til løpsleiar Arne-Kristian Glück-Teigland.

– Eg har vore med på mange av arrangementa han står bak. Det er veldig kjekt med arrangement som er litt utanom det som er vanleg. Desse litt sære løpa appellerer til meg. Det er utruleg kor mange profesjonelle arrangement dei klarar å dra i gang her i Hardanger, seier han.

– Litt skuffande

I år vart det for første gong arrangert ein halvmaraton som gjekk samstundes med Fyksesundet rundt. Fyksesundet halvmaraton starta på Hodnaberg og hadde, som Fyksesundet rundt, målgang ved Fykse skule. Halvmaratonen er om lag 28 kilometer lang. Åtte personar hadde meldt seg på. Heine Dalatun og Eivind Huse delte førsteplassen. Begge hadde tida 3.45.00. Einaste dame som gjekk halvmaratonen, var Kari Iren Kvarv – ja, systera til han som åt og åt – med tida 7.19.37.

Arne-Kristian Glück-Teigland fortel at til saman 39 deltakarar gjekk Fyksesundet rundt og Fyksesundet halvmaraton. Sjølv om vinnaren i år bruka om lag ein time meir enn vinnaren i fjor, er snittida lågare i år enn tidlegare.

– Mange av løparane set stadig nye personlege rekordar. Det mest ekstreme dømet er vel ein som slo sin eigen personlege rekord med tre timar. Det verkar som om det er mange som har trena godt og mange som tener på at dei har gått turen før og byrjar verta kjende med løypa, seier han.

Glück-Teigland hadde håpa på større interesse for halvmaratonar.

– Kanskje har me ikkje vore flinke nok til å marknadsføra nyvinninga? Planen er å arrangera to løp til neste år òg, og så får me håpa på større interesse då, seier han.