Manglar framleis ny kyrkjeverje

Ei kvinne som var innstilt til stillinga som ny kyrkjeverje i Kvam, sa tysdag kveld at ho takka nei til stillinga og trekte seg.

– Så no må me byrja på nytt att med å rekruttera, seier vikarierande kyrkjeverje Hans Soldal i Norheimsund.

Han har starta ein intern rekrutteringsprosess i lag med fellesrådsleiaren.

– Me må ha ein relativt tett kalender frametter for å få det til å fungera. Eg reknar med at i løpet av få dagar skal me vera i gang med rekrutteringa, seier Soldal.

Ein må lysa ut stillinga på nytt, og viss ein får søkjarar, skal dei intervjuast.

Sist vart den ledige stillinga lyst ut i HF og Vårt Land. Kva som vert brukt denne gongen, er usikkert. Lokalavisa vil verta nytta. Ein er ikkje ferdig med å planleggja enno. Det er snakk om økonomiske og praktiske gjeremål, fortel Soldal.

Han er vikar fram til 31. juli. Det tyder at det hastar med å finna ei permanent kyrkjeverje, etter at Olav Skeie Lid slutta i stillinga i fjor.

– Me er ute etter tips om folk som kan tenkja seg jobben. Det er ein ny arbeidsmarknadssituasjon med mange permitteringar. Kanskje nokon som har vorte arbeidslaus, vil ha jobben? seier Soldal.

Det er få formelle krav til den som skal verta kyrkjeverje. Vanlegvis seier ein at det krevst ei høgskuleutdanning, men det er ikkje eit formelt krav. Allmenn- og realkompetanse kan vera nyttig.

– Ein bør ha erfaring med sakshandsaming og med å møta folk. Det er ingen teologiske eller bygningstekniske krav for stillinga. Samstundes kan desse tinga forsterka ein søknad. Økonomi og personalhandsaming kan òg vera nyttig å kunna, seier Soldal.