Lanserer uhøgtidleg poesi

Birger Linga gjev laurdag ut diktsamlinga Frå vogge til Nav, der han diktar om alt frå barndomsminne og arbeidsliv til fest og moro.

Linga har alltid hatt lett for å uttrykkja seg skriftleg, og byrja skriva på rim då han gjekk på barneskulen i Ytre Ålvik. Boka inneheld dikt om mellom anna pubertet, skyttarmiljø, fest og moro og lokalpolitiske tema.

– Eg skreiv ein heil del i ungdommen, særleg i samband med ein tvilsam skyttarkarriere. Det vart ein del opptredenar på skyttarfestar, fortel Linga.

Seinare har han skrive jamt og trutt og presentert dikta ved ulike høve. Han sparkar i ulike retningar, gjerne med ein ironisk snert.

– Eg har arbeidd som fiskeoppdrettar og har difor skrive litt om det temaet òg, seier Linga.

Med humor

Linga seier at han stort sett diktar om lettare ting i boka, men han har også kommentert politikk og meiningar om saker i lokalmiljøet. Desse dikta har tidlegare vore på trykk i HF. Skulesaka og konflikten mellom Norheimsund og Øystese er tekne opp i fleire av dikta. Som fiskeoppdrettar har han også nytta høvet til å harselera litt med dei som kritiserer dei som har gjort det godt i næringa.

– Eg har fått ein del positive tilbakemeldingar, og det har inspirert meg til å fullføra boka.

Dikta har mykje humor, både på godt og vondt, meiner Linga.

– Eg har skrive ein del som er litt på kanten, men lever godt med det sjølv. Dikta har vorte godt mottekne likevel i min omgangskrins, så får lesarane vurdera dei sjølve, seier han.

Har vorte påverka

Linga fortel at han har vorte påverka av slekt, vener og arbeidskollegaer til å gje ut dikta i bokform. For nokre år sidan bestemte han seg for å gå laus på arbeidet.

– Folk veit at eg har skrive ein del og fleire har fatta interesse for det. Dikta har slege godt an i enkelte samanhengar, seier Linga.

Han har fått oppfordringar om å skriva ein del dikt ved ulike høve, men har også teke initiativ til mange av dikta sjølv.

– Mange av dikta har komme overraskande på dei involverte, fortel Linga.

Han er inspirert av Magnar Hjøllo frå Ytre Ålvik, som har gjeve ut ei liknande bok tidlegare.

– Uhøgtidleg bok

Forfattaren vil karakterisera boka som ei uhøgtidleg diktbok som tek føre seg mykje som er ganske privat.

– Det er ikkje ei diktsamling. Eg har også valt å skriva ein del til dikta for at lesarane skal få litt innsyn i kva eg skriv om, seier Linga.

Mange av dikta er knytte til større og mindre hendingar i nær familie og venekrets, eller frå arbeidsliv og fritidssyslar, står det i innleiinga i boka.

Sidan fleire av dikta er laga med tanke på munnleg framføring, har Linga nytta dialektord og forkortingar for å få god flyt. Han har valt å presentera dei fleste dikta i opphavleg form.

– Best under press

Linga seier at det ikkje alltid er lett for han å skriva dikt. Særleg når han har fått oppfordringar på førehand, har det teke tid å komma i gang. Det kan gjerne vera dikt knytte til spesielle hendingar, bursdagar og firmafestar.

– Når eg først får eit tidspress på meg, går det lettare. Eg skriv betre under press, og når eg først er i gang, går det lettare, seier Linga.

Nokre av dikta er det ein melodi til. Desse har berre vore sungne når han har gjort det sjølv, og ifølgje Linga er han ikkje nokon songar.

– Eg skal ikkje presentera nokon reprise av songen. Men det er greitt for dei som les å tenkja på ein melodi. I tillegg tykkjer eg det er lettare å skriva når eg har ein melodi som gjev eit oppsett, seier han.

Skal signera

Laurdag vert det lansering av boka i Huus bokhandel i samband med Hardanger frukt- og siderfestival. Linga skal vera tilstades i bokhandelen og signera boka.

Linga har trykt boka i 500 eksemplar, men seier det kan verta aktuelt å trykkja fleire dersom etterspurnaden tilseier det. Riss grafisk formgjeving AS har laga bokbunaden.