Set foten ned for zipline
Politikarane i Kvam takkar nei til glideline over Movatnet.
Formannskapet tok onsdag ei prinsippavgjerd om at ein ikkje ønsker å opna for å regulera zipline over Movatnet.
Tiltakshavar er Hardanger Zipline AS, der Asbjørn Tolo er styreleiar.
Artikkelen held fram under annonsen.
Vedtaket var i tråd med tilrådinga til rådmannen, som peikte på naturverdiar og at både startområdet og landingsplassen for den planlagde ziplina er sett av til landbruk i kommuneplanen. Etablering av slike aktivitetar bør skje i område med mindre konfliktpotensial, og helst i samband med etablerte turistanlegg, meiner rådmannen.
– Viktig viltområde
Formannskapet var samla i saka.
– Det er kjekt med eit nytenkande og aktivt næringsliv, men me ser ikkje dette som aktuelt på dei areala som ligg føre, sa Johanne Neteland (Sp).
Varaordførar Frode Nygård (Frp) såg for seg ein kostbar, krevjande og langdryg «runddans» med uvisst utfall om ein skulle gå inn for å regulera området.
Rapporten «Viltet i Kvam» frå 2002 peiker på 24 prioriterte viltområde i heradet. Av desse er åtte kategoriserte som «svært viktige». Området kring Movatnet er eitt av desse, påpeiker rådmannen.
Ifølge rapporten er området eit viktig trekk-, beite- og hekkeområde for fugl, mellom anna måsar, vade-, vass- og andefuglar. Nærleiken til Norheimsund sentrum gjer at området allereie er under press.
– Ved å gjera inngrep som me ikkje ser dei fulle konsekvensane av, kan me gjera uerstatteleg skade, sa Hans Arne Børsheim (KrF).
– Vondt i sjela
Også Børsheim sa at partiet generelt ønsker velkomen friske initiativ.
Artikkelen held fram under annonsen.
– Forhåpentlegvis kan dette realiserast ein annan stad, sa han.
Svein Johannes Stuve (Sp) sa at det gjer vondt i sjela å røysta mot slike tiltak, men at han ser at det kan verta konfliktar kring plasseringa.
– Eg håpar tiltakshavaren vil halda fram med tanken og finna eit område som er like spanande, sa han.
Jostein Ljones (Sp) var ugild i saka, sidan far hans, Torleiv Ljones, er dagleg leiar i Hardanger Zipline AS. Svein Johannes Stuve (Sp) er onkel til ein av grunneigarane, men formannskapet erklærte han gild.
