Nettselskap investerer

Hardanger Energi Nett i Kinsarvik gjekk inn i 2020 med eit rekordhøgt investeringsbudsjett på 95 millionar kroner.

Den høge aktiviteten i konsesjonsområdet held fram, trass i situasjonen med koronapandemien, melder verksemda i ei pressemelding.

Det er sett i verk fleire interne smitteverntiltak. Selskapet fylgjer råd og påbod frå sentrale mynde. Ein vil òg sikra så normal drift som mogeleg.

Digitale løysingar for samhandling og heimekontor vert nytta for å avvikla byggemøte, ta imot installasjonsmeldingar og gjennomføra prosjektering. Montørstyrken er inndelt i arbeidslag med ulike oppmøtestader, og har minst mogleg kontakt med kvarandre på tvers av avdelingane.

Pågåande lineprosjekt i Eidfjord, og mellom Herand og Jondal, er venta ferdigstilte i løpet av året. Elektrifiseringa av ferjesambanda i konsesjonsområdet er i sluttfasen.

Det skal byggjast ny transformatorstasjon på Trå i Herand, og stasjonane på Klyve i Eidfjord og Bu i Ullensvang skal rehabiliterast. I den samanheng har selskapet tinga tre transformatorar frå leverandørar i Europa. Leveransane av desse kan verta påverka av til dømes reiserestriksjonar, opplyser Hardanger Energi Nett.