Koronatiltaka vert vidareførte til over påske

Statsminister Erna Solberg (H) kunngjorde på ein pressekonferanse tysdag at tiltaka som er iverksett for å hindra spreiing av koronaviruset, vert vidareførte til 13. april.Dette innber mellom anna at skular, barnehagar og frisørsalongar må halda dørene lukka til over påske. Det gjeld òg avgrensingane på reiser og oppmodingane om å halda seg heime.– Tiltaka ser ut til å bremse smitten, men vi treng meir tid for å sjå kva verknad dei har. Regjeringa har fastsett ein strategi for å avgrense smittespreiinga som inneber at kvar enkelt som er smitta, maksimalt skal smitte éin annan person. Då vil helsevesenet ha kapasitet til å hjelpe alle som treng det, seier statsminister Erna Solberg.

Tilrår vidareføring

Vidareføring av tiltaka samsvarar med tilrådinga frå helsestyresmaktene.– I dag er målet vårt å slå ned koronaepidemien så langt vi kan, sa helsedirektør Bjørn Guldvog på ei pressebrifing tysdag.Det overordna målet er at kvar person som får koronaviruset i Noreg, i gjennomsnitt smittar færre enn éin ny person. Då vil smitten over tid gå tilbake.– Det er eit krevjande mål å oppnå, men vi kan ikkje gi det opp i dag, sa Guldvog.Vidareføringa tyder:• Framleis stenging av skular og barnehagar. Her opnar Helsedirektoratet for enkelte justeringar, spesielt opp mot sårbare barn.• Framleis stenging av verksemder som ikkje kan følgje pålegget frå styresmaktene om smittevern. Det omfattar mellom anna fysioterapeutar, kiropraktorar, optikarar, fotterapeutar, logopedar og psykologar.• Framleis stenging av arrangement, treningssenter, symjehallar, frisørar, hudpleie og liknande.• Helsepersonell som jobbar med pasientbehandling, blir framleis forbodne å reise til utlandet.• Personar som kjem til Noreg, skal opphalde seg i karantene i fjorten dagar.• Personar som har hatt nærkontakt med smitta, skal vere i karantene i fjorten dagar.• Personar som er mistenkte smitta eller stadfesta smitta, skal opphalde seg i isolasjon.• Alle helseinstitusjonar skal gjennomføre inngangskontroll og alminneleg besøksstans.

Oppdaterte scenario

Bakteppet er oppdaterte scenario frå Folkehelseinstituttet (FHI) som viser at talet på smitta kan auke svært raskt viss Noreg lempar på tiltaka no.Med få eller ingen effektive tiltak kan det bli snakk om opptil 223.750 smitta innan 13. april, ifølgje FHI-scenarioa.I ein slik situasjon kan opp mot 4.260 personar trenge innlegging på sjukehus, med 580 som treng intensivbehandling.– Dei neste vekene blir utfordrande for alle, men viss vi lykkast, vil vi kunne lette på tiltaka om nokre veker og sakte, men sikkert vende tilbake til normalen, sa Guldvog.Håpet hans er at dei første justeringane kan kome etter påske.

NPK–NTB og Eirik Dyrøy Lotsberg