Slik minkar smittefaren i bil

Det er lurt å gjera nokre tiltak i eigen bil for å unngå korona-smitte. Det seier seniorrådgjevar i Naf, Nils Sødal, i eit presseskriv. Viss fleire brukar bilen, eller du brukar bildelingstenester, er det ekstra viktig med reingjering.

Nokre delar er viktigare å vaska grundig. Det gjeld spesielt ratt, girspaken, knappar og dørhandtak – alt du rører mykje ved når du er ute og køyrer. Viruset kan setja seg på dei mange harde kontaktflatene i bilen og overleva ei stund.

Før du vaskar bilen, må du vaska hendene dine grundig. Til interiørvasken kan du bruka ein mikrofiberklut med vatn og såpe.

– Vårt råd er at du brettar kluten mellom kvar overflate du vaskar. Du bør unngå å dyppa kluten i bøtta for å fukta kluten på nytt, men heller ta ein ny mikrofiberklut for å ta dei overflatene som står att, tilrår Sødal.

Bruk ikkje Antibac på interiøret. Sødal tilrår å ha eingongshanskar i bilen for å bruka på hurtigladestasjonar og drivstoffpumper. Det er òg nyttig å ha Antibac i bilen for å reingjera hendene når ein er på farten. Har du vore på butikken eller liknande, bruk Antibac før du opnar bildøra.

Vask òg bilnøkkelen med Antibac før du hengjer han frå deg.

– Hugs at skikkeleg handvask er effektivt, så vask hendene grundig med såpe med ein gong du kjem heim etter bilturen, seier kommunikasjonsrådgjevaren.