Årsmøte i Kvinnherad - Kvam bonde- og småbrukarlag
Kvinnherad – Kvam bonde- og småbrukarlag avvikla årsmøte på Vangssaga i Rosendal måndag 2. mars. Vanlege årsmøtesaker vart behandla og godkjende. Frå landbrukskontoret i Kvinnherad hadde vi med oss Karin Thailand og Tore Eik, som orienterte om aktuelle saker dei er engasjerte i. No er framlegget til ny landbruksplan lagt ut på høyring, og dei oppmoda næringa å koma med innspel innan 17. april. Elles er det stor aktivitet i kvinnheradlandbruket med bygging, nydyrking og gardsoverdraging. Dei oppmoda oss om å nytta Facebook-sidene som kontoret har oppretta som kontaktarena mellom dei og bøndene. Her vert lagt ut møteinnkallingar, informasjon om søknadsfristar og mange fine bilete frå det som skjer i næringa.
Med på møte var også fylkessekretær i Hordaland bonde- og småbrukarlag, Åse Marie Reisæter. Ho fortalde om arbeidet i fylkeslaget. Sjølv om fylket no heiter Vestland, har ein inntil vidare valt å halda på den gamle fylkesstrukturen med to lag i Vestland. Ei viktig sak har vore korleis ein skal fordela reduksjonen på mjølkesektoren slik at ein ikkje berre sit att med store produsentar. Elles var ho innom mange aktuelle og viktige tema for vestlandbruket.
Laget har 56 medlemer, og i styret er desse med: leiar Siri Byrkjeland, skrivar Torbjørn Fosso, kasserar Bjørn Helge Skåle, medlem Bergljot B. Hesvik. Varamedlemer: Vigdis Gammelsæter, Kurth Ystebø og Gudvin H. Volden. Revisor er Stein Olav Ølvestveit, og valnemnd er Einar Tvedt og Marion Bakke Byrkjeland.
Einar Johan Tvedt
