Kjem attende: Sigrunn og Egil Ersland er på Hardanger trebåtfestival for femte år på rad. - Eg har alltid likt meg her. Det er liv og røre, og mange kjente folk som har same interesse som oss, seier Sigrunn.
Heimelaga herskar på sin femte festival
Egil og Ingunn Ersland måtte først overtydast, men har sidan vore faste deltakarar på Hardanger trebåtfestival. Sjå biletserie frå festivalen her.
Mellom trebåtar av ymse slag, ubåtjagaren KNM «Hitra», scena, der vokalgruppa Teklang syng kjende låtar a capella, og eit festivalområde som yrer av aktivitet, ligg Ægir. Namnet har ingenting med øl å gjera - det er namnet til herskaren over havet i norrøn mytologi. Inkje mindre.
Alltid kjekt
Egil Ersland har bygd båten sjølv, ein prestasjon som tok han ti år. Med unntak av kunnskap om sveising hadde han ingen båtbyggarerfaring. Det stoppa han ikkje. - Han trong noko å gjera på, fortel kona Ingunn. Det er femte året på rad dei to vitjar festivalen. I 2014 var dei på båttur til Norheimsund ei veke før festivalhelga. Dei var motvillige først, men vart overtydde til å komma til festivalen. Sidan har dei ikkje vore i tvil. Her treff dei eit hav av andre med same interesse. - Eg har alltid likt meg her, seier Ingunn. - I kveld skal me ha felles middag. Me hjelper til med å skrella poteter og anna. Det er ein dugnad for å laga bacalaoen. Det synest eg alltid er kjekt, seier ho. Egil skryter av arrangørane. - Det er alltid kjekt å komma hit. Ein vert møtte på kaien av hyggelege folk, og det er ingen sure miner. Det er veldig positivt, seier han. - Det er eineståande, kjekke folk her. Eg likar meg godt i Norheimsund, seier Ingunn. - Me kjem igjen til neste år òg.
Artikkelen held fram under annonsen.
Havets herskar
Ægir er i bruk gjennom heile sommaren, både til langturar på Vestlandet og som «hytte» når han ligg til kai. Dei lengste turane frå Uskedal, der paret bur, har gått til Stavanger og Ålesund. - Eg har alltid hatt interesse for båt. Eg vaks opp ved sjøen, og har vore mykje ute, seier Egil. Å ha ein «heimelaga» båt har aldri vore ei bekymring - og han har heller aldri gitt dei noko trøbbel. - Han toler mykje. Og me har vore i ganske høge bølger, fortel Ingunn. Det var ho som høyrde namnet Ægir - og tydinga av det - på radioen. - De ser på båten som havets herskar? - Ja. Det er Colin Archer som har teikna han, seier Egil. Archer er ein norsk båtkonstruktør som mellom anna stod bak polarskipet «Fram» til Fridtjof Nansen og skapte redningsskøytene. Ægir vart sjøsett i 1989 og ferdig innreia ti år seinare. I mellomtida vart ein arbeidskrakk brukt som bord. - Me har brukt båten sidan dag éin, seier Egil. I nyare tid har namnet Ægir fått ein annan assosiasjon, nemleg til øl frå Flåm. - Eg fekk eit ølglas frå bryggeriet. Dotter mi ringde han for å kjøpa julegåve til meg. Ho fortalde om båten og at eg hadde bygd han sjølv. Han vart så imponert at han sende glaset gratis. Schnapps-glas òg, fortel Egil.
