Lausriving: Skal Mundheim verta del av Fusa i staden for Kvam? Biletet er frå 17. mai-feiringa. Arkivfoto. Bjørn Kjetil Hansen

Mundheim vurderer å riva seg laus frå Kvam

Førre tysdag kalla Mundheim grendeutval inn til møte i Grannehallen. Grendeutvalet spurde innbyggjarane om utvalet skal arbeida for at bygda skal gå over til Fusa kommune eller bli verande i Kvam.

Publisert: 12.10.2016 14:55 Sist oppdatert: 16:57

Ifølgje styreleiar i grendeutvalet, Kristoffer Mundheim, kom det fram ulike synspunkt på kommunereformmøtet. Dei som er positive til å flytta over til Fusa, må gje beskjed denne veka, seier Mundheim.

Det var til saman 35 personar med røysterett på møtet. Dersom 18 seier ja til å bytta kommune, vil grendeutvalet arbeida vidare med saka.

– Er det færre enn det, lèt me saka liggja, seier Mundheim.

Ifølgje Mundheim er avstanden til tenester er hovudargumentet for å hoppa over til nabokommunen.

– Me er mykje nærare Eikelandsosen enn Norheimsund. Mange brukar til dømes legekontoret på Eikelandsosen. I tillegg er me mykje nærare sjukehuset i Bergen enn på Voss, seier styreleiaren.

Han legg til at Mundheim vil vera ein utkant uansett om bygda ligg i Kvam, Fusa eller ein eventuell ny Bjørnefjorden-kommune etter 2020.

Mundheim seier grendeutvalet arbeider korkje for eller mot samanslåing, men bøyer seg for fleirtalet i bygda.