Sponheim forskoterer kuvending i Jondal

Kvam får stå åleine, medan Jondal bør slå seg saman med Odda og Ullensvang.

Det tilrår fylkesmann Lars Sponheim, som i føremiddag offentleggjorde råda han gjev regjeringa om kommunestruktur i Hordaland.

I dokumentet skriv han at avklaringa av ”Nye Ullensvang” kommune kjem onsdag. Då skal jondalspolitikarane igjen drøfta struktursaka i eit ekstramøte i kommunestyret. Fylkesmannen har vore sterkt involvert i den lokale kampen om å få saka teken opp att, berre månader etter at ho vart avgjord.

– Robust og sterk

– Etableringa med regionsenteret Odda som kommunesenter vil danna ein sterk og robust kommune som denne delen av fylket har sterk trong for, skriv Sponheim.

Han skriv at mange pendlar frå både Ullensvang og Jondal til Odda, og at vegane til kommunesenteret er gode.

– Dette vert ein sterk industri-, landbruks- og reiselivskommune i fylkessamanheng. Hardanger har sterkt behov for å prioritera samfunns- og næringsutvikling og på sikt endra den demografiske balansen. Det er særs viktig å utvikla interessante og fagleg tunge

kompetansemiljø for å rekruttera etterspurd arbeidskraft til området. Inntekter knytte til skattlegging av kraftutbygging gjer denne kommunen robust til å kunna møta både investeringsbehova og handtera uføresette økonomiske utfordringar, skriv Sponheim.

Kvam vert som før

Om Kvam skriv han at kommunen har to bygdesenter i tillegg til regionsenteret Norheimsund, og ein godt utbygd skulestruktur. Ingen har ynskt å slå seg saman med kvemmingane, sjølv om dei har flørta i ulike retningar.

– Fylkesmannen ser ikkje at det er realistisk for Kvam å slå seg saman med andre kommunar, heiter det i tilrådinga.

Fylkesmannen meiner Hordaland bør ha ti kommunar etter reforma. Kvam og Kvinnherad er åleine om å vera som før i tilrådinga.

Sponheim ser føre seg at Granvin, Ulvik og Eidfjord vert ein del av Voss kommune. Trioen har fått utsett fristen for å ta stilling til 1. desember.