Meiner næringsrådet opptrer useriøst

Reidar Tolo synest spørjegranskinga til Kvam næringsråd er useriøs.

Hf.no omtala granskinga i går kveld.

Tidlegare heradsstyremedlem og samferdsleinteressert, Reidar Tolo, meiner dagleg leiar Torleiv Ljones har stilt leiande spørsmål, til dømes ved å stilla tunnel til Røyrli om fem år opp mot hardangertunnelen om 17 år.

– Det er som å spørja om du vil ha ein liten sjokolade no eller ei heil konfektøskje lang fram i tid, seier Tolo.

Ikkje medlem, men spurd

Han har sjølv motteke granskinga på e-post, sjølv om bedrifta han arbeider i, ikkje er medlem i næringsrådet. Han lurar difor på korleis teljinga har føregått når Ljones i ei oppsummering opplyser at 48 prosent av dei 98 medlemsverksemdene i næringsrådet har svara på granskinga.

Ljones opplyste i går til HF at han har etter beste evne har freista å ikkje stilla leiande spørsmål. Ifølgje, og at det krevst god kunnskap om lokale tilhøve for å stilla dei rette spørsmåla i granskinga.

To versjonar

Han opplyser til HF at granskinga er send i to separate versjonar. Den eine har gått til medlemene i rådet, den andre til kontaktane på kontaktlista til Ljones sjølv. Berre resultatet av medlemsgranskinga er gjort kjende. Den andre vert berre nytta internt i rådet, fortel Ljones. Han vedgår at det kan førekoma i nokre få tilfelle at det er registrert to svar frå same verksemd, men det påverkar ikkje resultatet i nemnande grad, fortel den daglege leiaren.

Han fortel at han kan sjå kven som svarar kva på granskinga, men at denne informasjonen ikkje kjem vidare frå han.

– At Reidar Tolo synest spørsmåla er leiande, undrar meg ikkje, men det er ingen medlemer som har gjeve negativ tilbakemelding, fortel Ljones.

Han har sendt resultata og oppsummering av granskinga til heradsstyret, som møtest i Kvam rådhus klokka 10 i dag for å drøfta samferdsle.