61 prosent valde Røyrli-tunnelen
Tysdag byrjar arbeidet med å få politikarane i Kvam med å bokstaveleg tala gjera vegval. Med seg får dei mellom anna ei fersk meiningsmåling.
Klokka 10 samlast dei folkevalde til arbeidsmøte i heradsstyresalen.
Då går startskotet for det ordførar Jostein Ljones (Sp) 30. august sa burde munna ut i store politiske val på samferdslefronten før nyttår.
Ingen Ole Brumm
Gjennom eit opplegg forma av konsulent Siv Sundgot i Norconsult skal heradsstyret freista finna ut korleis det meiner den reviderte Kvammapakken bør sjå ut. Mellom verkemidla er postit-lappar med ulike fargar, gruppearbeid, assosiasjonar og ”kaférunde”.
Bakgrunnen for møtet er at vegvesenet nyleg la fram ein rapport om alternativ til opprusting av fylkesveg 7 i Tokagjel. Samstundes la konsulent Helge Hopen fram alternative finansieringsløysingar. Han sa mellom anna at kvemmingane må velja mellom tunnel under Kvamskogen og håfjellstunnel. Ole Brumm-replikken ”Ja takk, båe delar” nyttar med andre ord ikkje lenger.
Artikkelen held fram under annonsen.
Heimesnikra gallup
15. september sende dagleg leiar Torleiv Ljones i Kvam næringsråd ut ei spørjegransking om Kvammapakken til dei 98 medlemene i rådet. Han har sjølv pønska ut spørsmåla og skrive den innleiande teksten til granskinga, og har etter beste evne freista ikkje stilla leiande spørsmål.
48 prosent av medlemene svara. 84 prosent svara at dei kan godte lenging av bompengeperioden med fem år. 54 prosent sa at dei godtek nye bomstasjonar sentralt i Kvam for å få ny veg til Bergen ”over Kvamskogen”. 76 prosent vil prioritera veg til Bergen i staden for håfjellstunnel, medan 24 prosent ynskjer sistnemnde realisert fyrst.
Ljones spurde om medlemene prioriterer lang hardangertunnel til Samnanger med byggjestart i 2033, tunnel til Røyrli med byggjestart i 2021 eller berre opprusting av Tokagjel i 2018. 61 prosent prioriterte Røyrli-tunnelen, 28 prosent hardangertunnelen og 11 prosent sistnemnde.
52 prosent meiner den øvre grensa for bompengetaksten er 15 kroner. 32 prosent toler 20 kroner, medan 16 prosent støttar 25 kroner som øvre grense.
