Fylkesmann Lars Sponheim (t.v.) og ordførar i Jondal, Jon Larsgard, i dagens hardangerrådsmøte. Kvammaordførar Josten Ljones sit med ryggen til.

Godbitar for politiske dyr

Formannskapsmøte, planutvalsmøte og hardangerrådsmøte – og Sponheim kjem til Kvam. Politisk interesserte kan gå bananas i dag.

Det politiske showet opnar klokka 9 i Kvam rådhus. Formannskapet skal få presentert utgreiinga av vegløysingar i Tokagjelet og moglegheitene for å utvida Kvammapakken.
Klokka 12.30 samlast planutvalet for å banka gjennom to saker. 20 minutt seinare har utvalet og formannskapet felles møte for å få arbeidet med arealdelen av kommuneplanen presentert av administrasjonen.
Ordføraren og rådmannen kjem til å forlata åstaden før dei sistnemnde møta. Dei skal nemleg delta i eit ekstra hardangerrådsmøte om kommunereforma på Thon Hotel Sandven klokka 12. Der møtest ordførarane i Hardanger og fylkesmann Lars Sponheim for å oppdatera kvarandre på arbeidet med reforma.
Sponheim er i vinden for tida, etter at han i eit møte i Odda 19. august i uparlamentarisk språkdrakt oppmoda jondølingane til å ta ein omkamp om kommunesamanslåing. Det fekk Sp-leiar i Jondal, Sigrid Brattabø Handegard, til å sjå raudt.
I dag kastar partifelle Per Olaf Lundteigen seg på. Han varslar at framferda til Sponheim kan verta teken opp i kontroll- og konstitusjonskomiteen på Stortinget. Han meiner språkbruken til Sponheim var så grov at han må få følgjer.

Sponheim sa nyleg til regionavisa at han ikkje vil ta opp diskusjonen med ein innbyggjar i Jondal utan ei rolle i reformsaka.
Alle dei nemnde møta er ope for ålmenta.