Slår til med ny Hardangerbeat

24. september vert det ei ny utgåve av Hardangerbeat i Norheimsund.

Initiativtakarane Jon Kjosås og Håkon Valland varslar ein fin bukett av band på beatkvelden.

Lunick Five, Last Explosion og Fusa-bandet El Toledo kjem. I tillegg kjem bandet som har fått tittelen Nye The Shivers, med tre musikarar som i si tid starta kvar sine band. Arvid Fosse, som bur i Canada, starta gamle The Shivers, Tarjei Flotve starta The Mavericks, og Odd Arve Sandven starta Lunick Five. Med seg har dei Åge Røthe, som vart heftig imponert då han såg The Shivers spela på Voss i 1963.

– Det har han aldri gløymt, fortel Jon Kjosås, som sjølv er del av Lunick Five.

Sidan har Røthe, som spela i bandet Vaqueros, vorte ein av landets beste shadowsgitaristar. Han kom i kontakt med Håkon Valland via Facebook.

Kvartetten øver for tida på kvar sin kant på musikken dei skal spela i Kvam i september. Torsdagen før Hardangerbeat møtest dei for å ta finpussen.

På dagtid, på den nye scena på torget i Norheimsund, får publikum smakebitar av kva som er i vente seinare på kveld. Sjølve beaten vert å høyra på Thon Hotel Sandven, som har plass til 300 gjester.

I fjor vart 50-årsjubileet til Last Explosion feira, så det er ikkje så lenge sidan musikken frå gamle dagar var å høyra i Kvam, men det er 14 år sidan det sist vart arrangert Hardangerbeat.