Lucky kom til rette

Ein papegøye på Børvenes stakk av onsdag. Kvelden etter vart han funnen.

HF har i dagens avis omtala papegøyen Lucky, som fauk ut døra til familien Garen på Børvenes. Men nesten før trykksverta var tørr, kom fuglen til rette.

Fuglen vart oppdaga av grannar i skogen på Børve. Dei reagerte på høg plystring, og såg papegøyen høgt i eit eiketre. Etter to timars lokking med favorittmaten, mais, makta ikkje Lucky å motstå freistinga lenger. Han kom og sette seg på skuldra til matmor Ann-May Garen igjen. Ho er polititilsett og kunne eskortera rømlingen heim att i tenestebil. Heime venta tre glade born som hadde sakna fuglen sårt.

Garen meiner den grå papegøyen har kome godt frå overnattinga i det fri, som må ha vore både kald og våt. Dessutan var fuglen heldig som unngjekk å verta teken av rovfuglar.

– No it han nøgd i buret sitt og gneg på ei peanøtt, sliten og svolten etter eit døgn i fridom og på rømmen, fortel Ann-May Garen.

– Han er veldig sosial og ikkje redd folk, og han plystrar og snakkar, fortalde matfar Morten Garen til HF før fuglen dukka opp att.

Papegøyen er ti år gamal, men kom til familien fyrst i sommar. Opphavleg er han rogalending. Fuglane kan verta gamle og er temmeleg dyre i innkjøp.

Garen fortel at både han, kona og dei tre borna sprang ut i det ausande regnet for å leita etter kjælefuglen etter at han stakk av.

– Det var berre sorga, fortel han.