Arbeidstilsynet kjem til Jondal torsdag og fredag etter å ha fått fleire uromeldingar som inneheld påstandar om mellom anna dårleg arbeidsmiljø. Mellom anna organisering av oppgåver, ansvarsfordeling, møtekultur, takhøgd for kritikk og manglande oppfølging av konfliktsaker, av varsel om kritikkverdige tilhøve, av førebygging og handtering av sjukmelde, av avtalen om inkluderande arbeidsliv og av kartlegging og risikovurdering fekk kritikk i meldingane til tilsynet. Seniorinspektørane Øyfrid Geiring og Evy Dale skal møta arbeidsgjevaren, verneombodet og representantar for arbeidstakarane torsdag. Dagen etter skal funna oppsummerast.
Vil høyra utfordringane
Føremålet med tilsynet er å kontrollera arbeidsmiljøarbeidet i kommunen og nokre utvalde organisatoriske arbeidsvilkår. Tilsynet kjem til å be om informasjon om korleis kommunen er organisert og kva som vert vurdert som dei største arbeidsmiljøutfordringane, ifølgje innkallinga til tilsynet, som vart send i juli.
Artikkelen held fram under annonsen.
Drøftar rutine
Arbeidstilsynet førte før sommaren eit såkalla postalt tilsyn, som inneber at kommunen vart pålagd å senda ei rekkje dokument. Eit av desse dokumenta var eit utkast til rutinar for varslingsituasjonar. Arbeidsmiljølova pålegg arbeidsgjevarar å ha ein slik rutine eller andre tiltak som legg tilhøva til rette for intern varsling om kritikkverdige forhold. Arbeidsmiljøutvalet skal onsdag morgon drøfta rutineforslaget.
Nekta fyrst innsyn
HF bad måndag om innsyn i utkastet til varslingsrutine, men fekk melding om at det ikkje skulle offentleggjerast før etter møtet i dag. Kommunen oppgav ingen heimel for avslaget. HF bad om å få heimelen for hemmeleghaldet oppgjeven, men fekk i staden tilsendt utkastet. Ifølgje kommunen er ikkje arbeidsmiljøutval pålagde å ha opne møte ettersom organet ikkje er folkevalt og dermed underlagt sakshandsamingsreglane i kommunelova.
